O‘zbekiston Respublikasi Kriminologiya tadqiqot instituti
Jinoyatchilik va jamoat xavfsizligiga tahdid soluvchi jarayonlarni ilmiy asosda o‘rganish, ularning sabab va omillarini barvaqt aniqlash, rivojlanish tendensiyalarini prognoz qilish hamda davlat va jamiyat uchun samarali kriminologik yechimlarni ishlab chiqish orqali xavfsiz va barqaror ijtimoiy muhitni shakllantirishga xizmat qilishdir.
Institut ilm-fan imkoniyatlarini davlat boshqaruvi va huquqni qo‘llash amaliyoti bilan bog‘lab, O‘zbekistonda jinoyatchilikka qarshi kurashishning dalillarga, ilmiy tahlil va prognozga asoslangan modelini rivojlantirishga intiladi. Bizning yondashuvimizda jinoyatchilik faqat statistika emas, balki ijtimoiy, iqtisodiy, texnologik jarayonlar bilan bog‘liq murakkab hodisa sifatida o‘rganiladi. Maqsad oqibatni emas, ildiz sababni aniqlashdir.
Ilmiy tadqiqotni davlat darajasidagi jinoyatchilikning oldini olish vositasiga aylantiruvchi o‘nta strategik vazifa.
Mamlakatdagi kriminogen vaziyatni muntazam kuzatish, jinoyatchilikning miqdoriy va sifat o‘zgarishlarini aniqlash, hududlar va jinoyat turlari kesimida tendensiyalarni baholash hamda istiqboldagi xavflarni ilmiy prognoz qilish.
Jinoyatlarni yuzaga keltirayotgan sabab, shart-sharoit va omillarni fanlararo metodlar orqali aniqlash, ularning o‘zaro bog‘liqligi va ta’sir mexanizmlarini ilmiy asosda tushuntirish.
Jamiyatda shakllanayotgan yangi ijtimoiy, texnologik va kriminogen xavflarni monitoring qilish, ularning jamoat xavfsizligiga ehtimoliy ta’sirini baholash va oldini olish bo‘yicha ilmiy yechimlar ishlab chiqish.
Respublikaning barcha hududlarida jinoyatchilikning o‘ziga xos xususiyatlarini o‘rganish, xavf omillarini aniqlash hamda hududning real sharoitidan kelib chiqadigan manzilli profilaktika mexanizmlarini ishlab chiqish.
Vazirlik va idoralar, hududiy davlat organlari hamda huquqni muhofaza qiluvchi tuzilmalar faoliyatida mavjud muammolarni tadqiq etish, ularni bartaraf etish bo‘yicha ilmiy asoslangan xulosa, tavsiya, metodika va amaliy mexanizmlarni taqdim etish.
Jinoyatchilikka qarshi kurashish va uning oldini olishga qaratilgan davlat siyosatini empirik ma’lumotlar, ilmiy tadqiqotlar va prognozlar bilan qo‘llab-quvvatlash, davlat qarorlarida ilmiy yondashuvning ulushini oshirish.
Amaldagi profilaktika tizimlari, dasturlar va tashkiliy mexanizmlarning real natijadorligini ilmiy mezonlar asosida o‘rganish hamda samarasiz yoki eskirgan yondashuvlarni takomillashtirish bo‘yicha takliflar ishlab chiqish.
Tadqiqotlarni faqat ilmiy hisobot bilan yakunlamasdan, olingan natijalar asosida normativ-huquqiy takliflar, metodikalar, dasturiy mahsulotlar, innovatsion ishlanmalar va amaliy tavsiyalar yaratish hamda ularni tatbiq etish.
Kriminologik tadqiqotlarda zamonaviy axborot texnologiyalari, sun’iy intellekt, raqamli tahlil vositalari va innovatsion texnik yechimlardan foydalanish, yangi shakllarga qarshi ilmiy-texnologik yondashuvlarni rivojlantirish.
Yetakchi xorijiy kriminologiya institutlari, universitetlar va xalqaro tashkilotlar bilan qo‘shma tadqiqotlar olib borish, ilg‘or metodologiyalarni o‘rganish va O‘zbekistonning kriminologik tajribasini xalqaro ilmiy maydonda namoyon etish.
Institut tadqiqotlarni bevosita davlat qarorlari bilan bog‘laydigan yagona ilmiy-amaliy siklni shakllantiradi:
